Бұған дейін төл газеттен тігін шеберлері маска тігіп, оның жетіспеушілігін болдырмауға үлес қосып жатқанын оқыдық. Ал аққорғандық ардагер ұстаз Шарбан Омарова үйіндегі материалдан маска тігіп, жақындарына тегін таратуда.


Шыны керек, «Он саусағы  майысқан ісмер болар ма екенсің» дейтін аталы сөз қазір елес болып қалғалы қашан. Ел ішінде осы Шарбан апа секілді он саусағынан өнері тамған ісмер шебер тігіншілер некен-саяқ. Көбісінің қолдарында тігін машиналары болғанымен маскалық мата жоқ. Содан да болар ісмерлердің дені үнсіз қалды.
Шарбан Шәкірқызы көршілері мен немерелерінің сыныптастарына маскалар тігуге кірісті. Мұны естіген ауылдастары маска тіктіруге тапсырыстар беруде екен. Тігінші тұрмысы төмен отбасыларға маскаларды тегін тігіп беруде екен.
Сындарлы сәтте тігіншінің тірлігін көріп отырып, біздің бақуатты азаматтардың қам-қарекетсіз отырғаны қынжылтты. Көпке шарапаты тимеген байлықтан не тәйірі?

Ерубай ҚАЛДЫБЕК