ҚАҢТАР АЙЫ: БАЗАРДЫҢ ЖАЙЫ ҚАЛАЙ?

Қазақстанда қаңтарда азық-түлік өнімдері 1,3% қымбаттады, деп жазды Егемен Қазақстан. Бұл туралы ұлттық экономика министрлігінің баспасөз қызметі хабарлапты. Расында, базар бағасына бақылау болмағасын баға тұрақсыздана береді...
«2019 жылғы қаңтарда Қазақстан Республикасында инфляция 0,5%-ды құрады. Баға азық-түлік тауарларына өткен айда – 1,3%, азық-түлік емес тауарларына 0,3%-ға жоғарылады, ал ақылы қызметтерге 0,2%-ға төмендеді», - делінген сенбіде таратылған хабарда.  
Министрліктің ақпарынша өткен айда бағаның өсуі жаңа жиналған көкіністерге – 12,2%, жұмыртқаға – 2,1%, тоқаш және ұннан дайындалатын өнімдеріне – 0,7%, темекі өнімдері – 3,6%, алкогольді ішімдіктер 0,8%-ға қымбаттапты. 
Бағаның төмендеуі құмшекерге 1,4%-ға тіркелген. 
Жолаушылардың әуе көлігімен жол жүру ақысы – 7,9%, темір жол көлігімен 4,2%-ға арзандады. 
«Тұрғын үй-коммуналдық қызметтер саласында тарифтер орталықтан жылытуға – 3,6%, кәрізге – 2,1%, суық суға – 2%, электр энергиясына – 1,4%, тарату желілері арқылы тасымалданатын газға – 0,4%, қоқыс шығаруға 0,3%-ға төмендеді», - делінген хабарда. 
Ал, Жаңақорғанда бағаның өсімі қатты білінбейді, дегенмен Сыр өңіріндегі төрт түліктен көш бастаған аудан үшін ет бағасы төмендемейтін секілді.