Жеңіл несиеге неге мүмкіндік көп?

Былтыр жылдық 5%-бен жеңіл кредиттің енгізілуі – шаруаларға көп көмек болды. Алғаш рет қажетті тауарлық-материалдық құндылықтарды толық көлемде сатып алуға, сондай-ақ ауыл шаруашылығы техникасын лизингке алуға мүмкіндік берді. Нәтижесінде, 5,8 млн га немесе жалпы егіс алқабының 25%-ы қамтылды, 4300 бірлік отандық ауыл шаруашылығы техникасы сатып алынды. Жеңіл лизинг бағдарламасын жүзеге асырудың арқасында өткен жылы ауыл шаруашылығы техникасы паркін жаңарту 5,5%-ды құрады. «Жалпы сомасы 35 млрд теңгеге айналым қаражатын толықтыруға өңдеу зауыттарына жеңіл кредит беру бағдарламасы іске қосылды. Биыл барлық аталған бағыттарда жұмыс күшейеді. Көктемгі егіс жұмысына жеңіл несие  көлемі 700 млрд теңгені құрайды. Егіс науқанын ерте қаржыландыру өткен жылы қарашада басталды. Фермерлер субсидиясыз таза 5%-бен жеңіл кредиттер алуда. Бүгінде 206 млрд теңгеге 1,8 мыңнан астам шаруашылық қаржыландырылды» деді Ауыл шаруашылығы министрі Айдарбек Сапаров.

Бұл тұрғыда жаңақорғандық шаруалар да шет қалмады. Біздің кәсіпкерлер ауданға бірнеше техниканы ала келді. Оның ішінде, тракторлар мен комбайндарға басымдық беріліпті. Сондай-ақ, биыл дрондар алып келу көзделіп отыр. Енді өңір басшысының мәжілісіне ойыссақ. Облыс әкімі өткізген мәжілісте күн тәртібіндегі және басқа да маңызды мәселелерге орай жауапты сала басшыларына тапсырма берілді.

Мемлекет басшысының, Үкіметтің жан-жақты қолдауымен ауыл шаруашылығы саласының дамуында оң динамика қалыптасты. Жыл сайын субсидия, жеңілдетілген несие беруге қомақты қаржы бөлінеді. Жақын күндері көктемгі дала жұмыстары басталады. Егін егу науқанына қажетті жанар-жағармай, техника, тыңайтқыштардың нақты көлемін есептеп, дер кезінде жеткізілуін қамтамасыз етіңіздер. Бұл жұмыстарға қала, аудан әкімдері де жауапты.