Кәусардың қуанышы
«Nur Otan» партиясы, «Qazaq epos» қоры және Білім және ғылым министрлігі бірлесе ұйымдастырған «Тұлпар мініп, ту алған» аудандық байқауында №247 орта мектептің 8 сынып оқушысы Кәусар Нұрғазықызы дараланды. Біз білімпаз қызды кейіпкер еттік.
Байқау талабы – 6-10 сынып оқушылары «Едіге батыр» жырын жатқа айтуы тиіс. Қатысушылар қосымша Ұлық Ұлыс – Алтын Орданың тарихына қатысты сұрақтарға жауап беріп, жырда кездесетін көнерген сөздердің мән-мағынасын түсіндірді.
Кәусардан ұзақ жыр жолдарын қалай жаттағанын сұрадық.
– Тарих және қазақ әдебиеті пәнін жақсы көремін. Біздің ұлтта құймақұлақ адамдар көп болғаны жайлы оқыдым. Мұндай қабілетті дамыту біздің де қолдан келеді. Осы ретте, ұстазым демеу көрсетіп, байқауға дайындалуға кеңес берді, – дейді дарынды қыз.
«Бұлақ көрсең, көзін аш» демекші, жас талантты жетелеп жүрген ұстазы Қалдықыз Нұртазаевадан шәкірті туралы сұрағанда:
– Талант – табиғаттың адамға сыйлайтын ғажап сыйы. Мен ұстаздық тәжірибемде оқушылардың қабілеті мен ыңғайын саралап, бағдарлаймын. Егер де оқушының жаттау қабілеті, мәнерлеп оқу мақамы жақсы екендігін байқасам, оны сайысқа дайындаймын. Мақсатым – жастар арасында кітап оқу мәдениетін қалыптастыру, өнерлі, дарынды жастарды анықтау, оларды білім шыңына жетелеу. Осы бағытта Кәусарды 5 сыныптан бастап таңдап алдым, алдымен ақынның шағын өлеңдерін жаттатып, оның тез жаттап саны артқан сайын қызығушылығы да артып, кейін шағын шығармаларын бітірген соң, орташа көлемді өлеңдерді, ал соңында күрделі туындыларды жаттап алды. Сонымен қоса сапалы жаттағанына да назар аударамын. Өзім бірнеше рет оқып, өлеңнің ырғағын, бунағын, кідірісін, интонациясын қойып, оқу мәнерімен жұмыс істеймін. Осы күні талабым мен талғамыма сай келген шәкіртім Кәусармен мақтанамын. Едіге батыр жырын Кәусар бір ай көлемінде толық жаттап алды, – деп ағынан жарылды.
Кәусар бос уақытында кітап оқып, ән айтып, сурет салғанды жақсы көреді.
– Тез әрі сапалы жаттауыма анамның, пән мұғалімінің қолдау-көмегі тиді. 26 қазанда ұстазыммен Жаңақорған кентінде өткен «Тұлпар мініп, ту алған» байқауына бардық. Алғашында аздап қобалжығаным рас. Өз-өзімді қамшылап, байқауға қатысқан 120-дан астам оқушыдан даралануға тыныстым. Еңбегім текке кетпеді. Қуаныштымын! – дейді ол.
Оның жетістігі бұл ғана емес. 2017 жылы «Жас зерттеуші» атты V Республикалық зияткерлік байқауында, 2021 жылы Республикалық 8 сынып оқушылары арасында өткен орыс тілі пәнінен ұйымдастырылған онлайн олимпиадада білімімен ерекшеленді.
Рауза ӘЗІЛХАН
