Әдебиет абызына құрмет
Қазақ әдебиетінің классигі, көрнекті қаламгер Әбдіжәміл Нұрпейісов 95 жасқа толды. Мемлекет басшысы Қасым-Жомарт Тоқаев ұлттық әдебиетті дамытуға айрықша еңбек сіңірген жазушы Әбдіжәміл Кәрімұлына жоғары дәрежелі ерекшелік белгісі – «Қазақстанның Еңбек Ері» атағын берді. Абыз ақсақалға жасалған құрметке барша қалам ұстаған қауым мерейленіп, ерекше шабыттанды.
Классик қаламгердің «Қан мен тер» трилогиясынан тарихи-әлеуметтік, саяси-қоғамдық өзгерістерді қапысыз танисыз. «Қан мен терді» оқи отырып адамды, адам мінезін нақты, шынайы, мейілінше терең, дәл бергенін көресіз. Ондағы кейіпкерлердің іс-әрекетіне қаныққан кезде, жүрегің шымырлап, кейіпкерлердің әрқайсысы тірі адамдай әсер қалдырады. Образдар, жеке-жеке оқиғалар, жеке-жеке детальдар – барлығы да шынайы. Барлығы да нағыз өмір.
Одан бөлек «Соңғы парызы» – қазақ көркем сөзінің мән-маңызын танытатын туынды.
Туындының маңызы жөнінде академик Зейнолла Қабдолов былай дейді:
«Соңғы парыз» – сөзсіз қазақ прозасының ең елеулі табысы. Осы бір жазушы бойына біткен табиғи талант тұтастығына таң қаламын. Егер де, «Қан мен тер» қазақ тағдыры мен тұрмысындағы Қазан төңкерісіне дейінгі кезеңді қамтыса, «Соңғы парыз» сол халықтың кеңестік дәуірдегі тағдыр-талайын қамтыған. Дей келгенде, Нұрпейісов трилогиясы мен дилогиясы – Отанымыздың ғасырлық тарихының айнасы» .
Заңғар жазушыны мерейлі жасымен және мәртебелі марапатымен шын жүректен құттықтаймыз.
