Бейбіт күннің бағасын білген халықпыз
Ақ көгершін – бейбіт аспанда қалықтап билейтін сұлу да, мейірбан, ақылды құс. Тек ашық аспанда ғана қанатын кең жайып, қалықтайтын көгершінді біздің халық бейбітшіліктің, достықтың, ынтымақтың, тату тіршіліктің символына балаған. Сондықтан да, «1 Мамыр Қазақстан Халқының бірлігі күні» дегенде санамызға ең алдымен ақ көгершін оралады. Бұл жолғы мерекелік салтанатты шара да сол сұлу құстың сипаттаған тіршілігі мен бейбіт күннің бейнесіне баланды. Яғни, көпшілік көзін еріксіз баураған орталық алаңдағы мерекелік безендірулер көгершіннің көрікті келбетімен қатар ұштасты.
Мың бұралған бишілердің салтанатты композициясымен ашылған сахна дүйім жұртты өнер әлеміне тереңнен бойлатып, ерекше тебіреніс сыйлады. Қазақ, корей, өзбек, орыс, украин, түрік, түрікмен сынды ұлттардың дәстүрлі киімімен қойылым қойған жігерлі жастар тобы талайды таңқалдырса, күлімдеген қыздардың иілген икемді биі жиылған жұрттың делебесін қоздырды. Сондай-ақ, ауданның бетке ұстар өнер майталмандары ерекше атсалысқан мерекелік концерт әуезді ән, сүбелі сөз, бұралған бимен жалғасын тапты. Игі шараның ашылуына сөз алған аудан басшысы Ғалым Әміреев:- Халық бірлігі қасиетті сөз. «1 Мамыр» – адалдық пен татулықтың, жасампаздық пен жақсылықтың, бейбіт күн мен береке баяндалатын шынайы мереке. Бірлік, достық, сыйластық болған жерде кез-келген елдің түтіні түзу түтеп, тіршілігі тынымды болатыны хаһ. Тұңғыш Президент Н.Назарбаев «Бір мақсат. Бір мүдде. Бір болашақ» деп Қазақстан халқын баянды болашақ жолында бөлінбей, бірге тірлік етуге шақырды. Міне соның нәтижесінде, көреген көшбасшының сарабдал саясатының арқасында елімізде түрлі ұлт өкілдері мен этностық топтар бір атаның балаларындай тіршілік кешуде. Өз ауданымыздың өзінде 600-ге жуық өзге ұлт өкілі тұрмыс кешіп, аудан абыройы үшін түрлі салада еңбек етіп жүр. 2017 жылы облыс бойынша «Үздік аудан» атансақ, 2018 жылы кәсіпкерлік саласының шыңын бағындырып, Республика бойынша II орынға шықтық. Мұның бәрі – татулықпен еткен тіршіліктің нәтижесі деп білемін. Олай болса, баршаңызды бір шаңырақ астында, баянды бақыт жолында аянбай еңбек етуге шақырамын. Бейбіт өмір берекесі, халық ынтымағы арта берсін, – деді. Игі мерекемен барша жұртты құттықтаған аудан басшысы, түрлі салада қызмет атқарып, еңбек сіңіріп жүрген өзге ұлт өкілдері мен аудан тұрғындарын арнайы «Алғыс» хатпен марапаттады. Концерттік бағдарламамен жалғасын тапқан орталық алаңда спорттық ойын түрлерінен де жарыстар ұымдастырылып, жеңімпаздар анықталды.
Ханзада ДОШАН.- Суретті түсірген Жасұлан СЕЙДЕМЕТОВ.
