Жол апатынан 5 қазақстандық қаза болды
Қаза болған азаматтардың төртеуі Ақтөбе облысының тұрғындары екен.
Ресейдің Орынбор облысында жол апатынан Қазақстанның төрт азаматы қаза тапты. Бұл туралы Ақтөбе облыстық төтенше жағдайлар департаментінің баспасөз қызметі хабарлады, деп жазады Baq.kz. Департамент мәліметінше, жол апаты 28 қараша күні 13 сағат 50 минут шамасында Орынбор облысындағы Елшанка селосына жақын маңда, Орынбор-Соль-Илецск бағытындағы жолдың 52-ші шақырымында болған. Ауыр жүк көлігі мен "Фольксваген" жеңіл көлігі соқтығысып, салдарынан бес адам қаза болған. Жараланған екі адам ауыр халде Соль Илецк қаласындағы ауруханаға жеткізілген. Ресей Төтенше жағдайлар министрлігіне сілтеме жасаған Ақтөбе облыстық төтенше жағдайлар департаменті қаза болған азаматтардың төртеуі Ақтөбе облысының тұрғындары екенін хабарлайды. Қаза тапқан тағы бір адамның қалтасында құжаты болмағандықтан азаматтығы анықталып жатыр.
