ӘЙЕЛДЕР ҚАНАТЫ – ҚОҒАМНЫҢ ҚОЗҒАУШЫ КҮШІ!

Әйел – отбасының берекесін ұйытып қана қоймай, қоғамның дамуына серпін беретін, ел болашағына елеулі үлес қосатын тұлға. Оның білімі мен білігі, белсенділігі мен азаматтық ұстанымы – әділетті қоғам қалыптастырудың маңызды тірегі.
Осы бағыттағы игі бастамаларды жүзеге асыру мақсатында Жаңақорған аудандық «Әділет» партиясының ұйымдастыруымен «Әйелдер қанаты» аясында «Әйелдердің қоғамдағы рөлі: мүмкіндік және жауапкершілік» тақырыбында мазмұнды кездесу өтті.
Кездесу барысында Жаңақорған аудандық «Әйелдер қанатының» мүшесі Алма Мамирова сөз сөйлеп, ізгі лебізін білдірді. Ол әйелдердің қоғам өміріндегі орнына тоқталып, олардың белсенділігі мен бастамашылдығы ел дамуы үшін маңызды екенін атап өтті.
Сонымен қатар аудандық кітапхана директоры Әсем Тілеубергенова да өз ой-пікірін ортаға салып, әйелдердің білім мен мәдениет саласындағы рөліне, қоғамның рухани дамуына қосар үлесіне тоқталды.
Басқосуда әйелдердің қоғамдық-саяси өмірдегі белсенділігін арттыру, көшбасшылық қабілетін дамыту, тәжірибе алмасуға мүмкіндік жасау және тың бастамаларға қолдау көрсету мәселелерінің маңызы айқындалды. Өйткені әйелдердің әлеуетін ашып, олардың қоғам игілігі жолындағы еңбегіне жол беру – ортақ жауапкершілік.
Әйелге берілген мүмкіндік – қоғамға берілген мүмкіндік. Әйелдің үні естіліп, бастамасына қолдау көрсетілген жерде жаңашылдық пен жасампаздыққа жол ашылады. Сондықтан әйелдердің қабілетін шыңдау, еңбегін бағалау және қоғамдық өмірге белсенді араласуына жағдай жасау – әділетті қоғамның басты ұстанымдарының бірі.
Бірлік пен білімді, мүмкіндік пен жауапкершілікті ту еткен «Әйелдер қанаты» алдағы уақытта да игі бастамаларға ұйытқы болып, әйелдердің қоғамдағы орнын нығайтуға және ел дамуына үлес қосуына серпін бере берсін!