РАМИДІҢ АЗАМАТТЫҚ ЕРЛІГІ

Қазір әлем футболға көз тігіп отыр. Әлем чемпионаты өтіп жатқан шақта жанкүйерлер әйгілі жұлдыздардың ойынын тамашалап, жаңа таланттардың жарқырауын күтеді. Бірақ үлкен ареналардағы жеңістің бастауы көбіне көзге көрінбейтін қарапайым адамдардың еңбегінен басталады.

Бүгінгі әңгіме дәл сондай азаматтың бірі – мыңдаған доллар емес, жүрегіндегі сенімін инвестициялаған мысырлық Рами Анвар туралы.

Египеттің Каир қаласының шетінде, әлеуметтік тұрмысы төмен шағын ауданның бірінде Рами Анвар есімді қарапайым азамат өмір сүрді. Бала кезінен футболды ерекше жақсы көретін.

Алайда оның өзі де, айналасындағы балалар да сапалы жабдықталған футбол алаңын тек теледидардан ғана көретін. Аулада шаң басқан топырақта доп тебу – олардың жалғыз мүмкіндігі еді.

Рами ұзақ жылдар бойы жинаған азын-аулақ ақшасына бос жер телімін жалға алды. Сөйтіп, шөп төсеп, қақпа орнатып, қарапайым футбол алаңын салды. Бұл жай ғана алаң емес, жасөспірімдердің үміті мен арманына бастайтын көпір болды.

Демеуші болған жоқ. Мемлекеттік қолдау көрсетілмеді. Жергілікті әкімдік те көмектеспеді. Бірақ Рами берілмеді. Ескі футбол доптарын өзі жамап, қақпашының қолғаптарын өзі тікті.

Арада алты ай өткенде алғашқы жаттығу басталды. Аула балалары алғаш рет шынайы қақпаның алдында жаттықты. Бірте-бірте балалар саны көбейіп, көрші аудандардан да келетін болды.

Қазір бұл шағын футбол мектебінде 50-ден астам жасөспірім тұрақты түрде жаттығады екен. Олардың арасында болашақ талантты шабуылшылар мен қорғаушылар өсіп келеді.

Қызығы сол – Египет футбол федерациясы мен демеушілер бұл бастама туралы кейін ғана естіп, қолдау көрсетті. Қазір бұл мектеп Каир маңындағы ең танымал жастар клубтарының біріне айналған.

Бәлкім, дәл осы алаңнан ертең әлем чемпионатында Египеттің намысын қорғайтын жаңа жұлдыз шығатын шығар. Ал оның алғашқы жеңісінің артында Рами Анвардың ешкім міндеттемеген, бірақ ел болашағы үшін жасаған азаматтық ерлігі тұрады.

Нұрлат Байгенже