«ХАЛЫҚ ЗАҢГЕРІ» РЕСПУБЛИКАЛЫҚ АКЦИЯСЫ АЯСЫНДА АЗАМАТТАР ТЕГІН КЕҢЕС АЛДЫ
Бүгін «Руханият» орталығында «Халық заңгері» жалпы республикалық акциясы өтті. Іс-шара барысында құқық қорғау саласы мен жергілікті атқарушы орган өкілдері тұрғындарға тегін кеңестер берді.
Акцияның негізгі мақсаты – халықтың құқықтық сауаттылығын арттыру және азаматтарға тегін заң көмегін көрсету болып табылады.
Шараға аудан прокурорының міндетін уақытша атқарушы Әділжан Сыздықов, аудан әкімінің орынбасары Бектас Нуридинов, сондай-ақ адвокаттар, нотариустар, тергеушілер, сот орындаушылары, білім, денсаулық саласы, салық қызметі мен жергілікті атқарушы органдардың өкілдері қатысты.
Акция барысында 60-тан астам аудан тұрғыны өздерін толғандырған сұрақтарына нақты жауаптар алды. Сонымен қатар, тұрғындарға интернет алаяқтықтың алдын алуға бағытталған ақпараттық жадынамалар таратылды.
