Фото:depositphotos.com
Қазақстан Республикасының Денсаулық сақтау министрлігі Ресейде жаңа вирус пайда болғаны туралы хабарламаларға пікір білдірді, - деп хабарлайды Tengrinews.kz тілшісі.

Бұған дейін бұқаралық ақпарат құралдары Ресейде адамға жұққан кезде жөтелден қан түкіріп, дене қызуы жоғарылайтын белгісіз вирус пайда болғанын жазған еді. Редакция бұл туралы Қазақстанның Денсаулық сақтау министрлігінен сұрап көрді.
Министрлік Ресей Федерациясының адам құқықтарын қорғау және тұтынушылардың әл-ауқатын қадағалау жөніндегі федералдық қызметінің (Роспотребнадзор) мәліметтеріне сүйене отырып, жаңа вирус тіркелгені туралы ақпараттың жоқ екенін хабарлады.
"Қазақстан Республикасының Денсаулық сақтау министрлігіне де жаңа вирустардың тіркелуі туралы ресми ақпарат түскен жоқ. Аталған симптомдары бар (қан түкіру, температураның көтерілуі – еск.) жағдайлар тіркелмеген", – деп жауап берді министрлік Tengrinews.kz редакциясының ресми сұрауына.