Заң және құқық тақырыбына арналды
Жазасын өтеп шыққан немесе пробация есебінде тұрған азаматтарды әлеуметтендіру, яғни қоғамға қайта бейімдеу мақсатында мемлекет тарапынан түрлі шаралар қарастырылуда. Жұмыспен қамту, шағын кәсібіне қайтарымсыз қаржы ұсыну және қайта оқыту сынды жеңілдіктер жыл сайын жалғасып келеді. Осы бағытта аудандағы атқарылған жұмыстар мен биылғы межені пысықтап алған жауапты сала басшылары бас қосты. Аудан әкімі Мажит Самитов және облыс прокурорының бірінші орынбасары Исламбек Төлегеновтің қатысуымен құқық бұзушылық профилактикасы бойынша жиын өтті.
Жиынға аудан прокуроры Дабыл Аянұлы, құқық қорғау органдары мен бөлім басшылары және жауапты сала мамандары қатысты. Сотты болған және пробациялық бақылауда жүрген азаматтарды бейімдеу және оларды оңтайлы жұмыспен қамту, әлеуметтік-құқықтық көмек көрсету шаралары, отбасылық тұрмыстық зорлық-зомбылықтың алдын алу мәселелері бойынша жауапты сала басшылары баяндама жасап, есептері тыңдалды. Алдымен жиын төрағасы аудан басшысы жиналысты түсіндіре отырып, қоғамдағы өзекті мәселелерге тоқталды.
Жаңақорған аудандық полиция бөлімінің бастығы Нұрлан Ибраев жалпы аудан көлеміндеі атқарылған жұмыстарды саралады. Қылмыстық істер мен пробация есебіндегі тұрған азаматтармен жұмыс қалай жүргізілуде, сол бойынша қысқаша баяндады. Қазір қылмыстың, алаяқтықтың түр-түрі пайда болуда. Оның үстіне қара тізімге ілінгендер де қайта жаза басып, істі болып жатқаны бар. Мәселен, көршілес ауданда пробация есебінде тұрған азаматқа бақылау болмағандықтан ол некелі жарына күш көрсетіп, соңы қайғылы оқиғамен аяқталды. Міне, осындай жағдайды болдырмау үшін учаскелік полиция қызметкерлері қатаң режимде жұмыс жасап жатқаны ескертілді.
Пробация есебінде тұрғандарға жұмыс беруден бұрын оларды өзін-өзі қамтамасыз етуге бейімдеу маңызды болып тұр. Яғни, кәсіпке ебі барларға қолдау білдіріп, шағын ісін дөңгелетуіне мемлекет мүмкіндігінше қолдау көрсетуде.
– Аудан бойынша 84 азамат есепте тұрса, соның биыл төртеуіне жолдама берудеміз. Қайтарымсыз қаржы алып, кәсібін бастауға және екінші бағытта қайта білім алып, диплом алуына мүмкіндік туып тұр. Олармен тығыз байланыс орнатып, барынша қалыпты өмірге, қоғамдық қызметке келуіне жұмыс жасаудамыз, – деді Жаңақорған аудандық пробация қызметінің бастығы Анарбай Искаков.
Жиын барысында аудандық жұмыспен қамту және әлеуметтік бағдарламалар бөлімінің басшысы Семсер Әсенов кәсіпкерлікке қолдау бағдарламасына өз тарапынан ұсыныс енгізуге ықпал жасауын сұрады. Яғни, осы есепте тұрған азаматтардың қарыз берешегі болған жағдайда сәл жеңілдік қарастырса деген ұсыныс айтты. Сондай-ақ, жиын барысында облыс прокурорының бірінші орынбасары «Қылмыссыз ауыл» жобасын жүзеге асыруды ұсынып, алкоголь өнімдерінің заңсыз, белгіленген уақыттан тыс сатылуына тосқауыл қою мәселесін көтерді. Одан кейін, пробациялық бақылаудың жайы мен қайта қылмыстың алдын алу, есептегі тұлғаларды жұмыспен қамту және мемлекет тарапынан көрсетілетін көмектермен қамтамасыз ету мәселесі бойынша уәкілетті органдарға міндеттер жүктелді
Қазақта «адасқанның айыбы жоқ, қайтып үйірін тапқан соң» деген тәмсіл бар. Сондықтан, қателікке бой алдырған жанның қатарға қосылуына қоғам боп көмектескен әлдеқайда абзал. Әйтпесе, қайта теріс жолдан табылуы ғажап емес. Әлеуметтік-құқықтық көмек көрсетудің негізгі бағыттарға пробацияның есебінде тұрғандарды жұмысқа орналастыру, емдеу, білім алуына жәрдемдесу, құжаттарын қайта қалпына келтіру, психологиялық көмек беру және өзге де әлеуметтік-құқықтар жатады. Азаматтардың осындай мүмкіндікті тиімді пайдаланып, өз кәсібін дөңгелетіп кетуі үлкен жауапкершілік, мемлекет сенім артып отырғаннан кейін азаматтардың да тасада қалып қойғаны қателік болар еді. Ең бастысы, қоғамға бейімделгендер қайта қылмысқа барып, жаза баспасы анық.
Әлібек ЖАРЫҚБАЕВ
