Шаттыққа толы мереке
Алдымен 500-ге жуық ақжаулықты аналар мерекеге орай аудан орталығындағы "Шаңырақ" аллеясынан "Прайм Парк" демалыс орнына дейінгі аралықты мерекелік шерумен жүріп өтті.
Жол бойы халық әндері шырқалып, тұрғындарға мерекелік көңіл-күй сыйлады.
Наурыз мерекесіне арналған салтанатты іс-шарада аудан әкімі Мұрат Тлеумбетов мерекелік көрмені аралап, аудан тұрғындары мен қонақтарын Ұлыстың Ұлы күні Наурыз мерекесімен құттықтады.
Мерекеге орай әрбір киіз үйде ұйымдастырылған «Бесікке салу», «Сырға салу», «Тілашар», «Қыз ұзату», «Асату» секілді ұлттық дәстүрлерді аудан тұрғындары тамашалады. Сонымен қатар «Тұсау кесер» дәстүрі бойынша сәбидің тұсауы кесіліп, ақсақалдар ақ батасын беріп, қадамына сәттілік тіледі. Қазақтың салт-дәстүрлері, ұлттық киімі, тағамы, ою өрнегі шараның шырайын аша түсті. Мерекелік көңіл-күй сыйлап, қаймағы бұзылмаған қазақы дәстүрдің айшықты бейнесі көрсетілген шарада қонақтар мен ақ жаулықты аналар лебіздерін білдірді.
Әрі қарай шара аудандық мәдениет үйінің ұйымдастыруымен концерт және театрландырылған мерекелік көріністермен жалғасты.
