Сунақ ата ауылында наурыз тойы тойланды
Бүгін Сунақата ауылында Ұлыстың ұлы күні - Наурыз мерекесіне орай «Наурыз - құт береке бастауы» атты мерекелік мәдени-көпшілік іс-шарасы болып өтті. Мерекелік шарада ауылдық округ әкімі аппараты, ауылдық клуб үйі, №194 орта мектеп, ауылдық спорт кешені және балабақшалардың бірлесе ұйымдастыруымен киіз үй, шатырлар тігіліп, барша ауыл тұрғындарына ұлттық тағамдардан әзірленген мерекелік дастархан ұсынылды.Әз-Наурызды Сунақата ауылдық округінің әкімі А.Жұмаділлаев ашып, мекеме басшылары мен ауыл ардагерлері мерекелік құттықтауларын жеткізді. Ауылдық клуб қызметкерлерінің ұйымдастыруымен концерттік бағдарлама беріліп, өнерпаздар өнерлерін көрсетсе, спорт кешенінің, демеушілердің қолдауымен ұлттық спорт түрлері яғни, арқан тарту, қол күрес, қазақша күрес, гір тасын көтеруден спортсүйер жастар бақ сынасты. Жеңімпаздарға арнайы сый - сияпаттар табысталды.
Ұлыстың ұлы күніне арналған мерекелік шараны тамашалауға келген тұрғындар бір біріне жақсы тілектері мен жылы лебіздерін білдіріп, көтеріңкі көңіл күйде тарқасты.
