Жасай бер, жазиралы Жаңақорған
![](/uploads/posts/2023-10/medium/1698120163_zhasay-ber.jpg)
Жаңақорған ауданының 95 жылдығы және “Жаңақорған тынысы” газетінің 90 жылдық мерейтойы кең көлемді үлкен деңгейде аталып өтті.
Қарт Қаратау мен сұлу Сырдың бойында қоныс тепкен киелі Жаңақорған топырағында бүгін үлкен мереке.
Іргетасы тоқсан бес жыл бұрын қаланған ауданның тарихы тереңде жатыр. Кешегі қазақ елінің астанасы болған Сығанақ қаласы осы дала төрінде жатыр. Киелі шаһардың келбеті қайта әрленіп, сыры бүгілген естеліктер жаңғырып келеді. Айтулы мереке күні Жаңақорған ауданында бірқатар нысандар ашылып, қорытындысында ауқымды гала-концерт ұйымдастырылды. Ғасырға бергісіз уақытта тарихи кезеңдерді өткерген ауданның айтулы күніне аймақ басшысы Нұрлыбек Машбекұлы бастаған мемлекет және қоғам қайраткерлері, ел ағалары мен арнайы шақырылған танымал тұлғалар, еліміздің түкпір-түкпірінен қонақтар және аудан тұрғындары қатысты. Облыс әкімі Нұрлыбек Нәлібаев аудан халқын қос мерекемен құттықтады.
«Биыл алты Алашқа пана болған Сыр бойындағы облыстың құрылғанына 85 жыл толды. Мерейлі мерекеге қызылордалықтар бекем бірлік, тату тірлігінің арқасында жақсы нәтижелермен жетті. Үкіметтің ресми мәліметі бойынша, облысымыз 9 айдың қорытындысымен республикадағы үздік үштіктен көрінді. Жаңақорған ауданының даму динамикасында да өсім бар. Ауданда жалпы құны 38 млрд теңгені құрайтын 10 ірі жоба жүзеге асырылуда. Ауыл шаруашылығы саласының даму қарқыны ерекше. Күні кеше өткен «Алтын дән» дала еңбеккерлерінің қорытынды шарасында Жаңақорған ауданы «Агроөнеркәсіп кешенін дамытуда ең жоғары көрсеткіштерге қол жеткізген үздік аудан» атанды. Барша еңбеккерлерді жеңісімен құттықтаймын. Президент Қасым-Жомарт Кемелұлы Нағи Ілиясов ауылында өткен еңбек адамдарымен кездесуде: «Шын мәнінде, еңбек адамдары – халқымыз үшін ең қажет азаматтар. Ең алдымен, біз еңбек адамдарына құрмет көрсетуіміз керек», – деген болатын.
Қойнауы құт, даласы дархан Жаңақорғандағы жасампаз жобалардың барлығы еңбек адамдары – сіздердің арқаларыңыз. Жазиралы Жаңақорған ауданының мерекесі бәрімізге ортақ. Мақсат – той тойлау емес, бір ғасырға жуық уақыт аралығындағы оқиғаларды ой елегінен өткізу. Елдің бірлігін нығайтып, игі іске жұмылдыру, – деді аймақ басшысы.
Нұрлыбек Машбекұлы елдің берекесі мен бірлігін сақтауға үлес қосқан, тәуелсіздік жылдарынан бері ауданды басқарған ел ағаларына алғыс білдірді. Тарихы тереңде жатқан қасиетті өлкеде өткен мерекелік кеште ауданымыздың қоғамдық-саяси өмірінің өсіп-өркендеуіне қосқан үлестері үшін бірқатар азаматтарға «Жаңақорған ауданының Құрметті азаматы» атағы табыс етілді. Мұнан бөлек, аудан мерейтойына арналған айтыс жеңімпаздары марапатталды.
Тарқатып айтсақ, медицина саласының ардагері, аудандық ардагерлер кеңесінің алқа мүшесі Әріпбек Асанов, ауылшаруашылығы саласының ардагері, 1989-1999 жылдары Түркістан совхозының директоры, 1999-2013 жылдары Қандөз ауылдық округінің әкімі болып қызмет атқарған, бірнеше мерекелік төсбелгілердің иегері Қалдан Жәнібеков, ауылшаруашылығы саласының ардагері, социалистік жарыстардың жеңімпазы, «Октябрь революциясына 60 жыл» медалінің иегері Абдужаппар Мырзабаев, педагогикалық білім берудің халықаралық ғылым академиясы мен Қазақстан Педагогикалық Ғылымдар Академиясының академигі, «Ыбырай Алтынсарин» белгісінің «Ұлағат» алтын медалінің иегері Айгүл Сәтбекова, тілші, баспасөз саласының ардагері, Қазақстан Республикасы «Мәдениет саласының үздігі» төсбелгісінің иегері Ерубай Қалдыбек, Қызылорда облысы денсаулық сақтау басқармасының басшысы Сәбит Пазылов, «Құрметті Энергетик», Қазақстан электр энергетикалық қауымдастығы атынан «Еңбек сіңірген энергетик төсбелгісінің иегері Нұрділдә Алтыбаевтар ауданның «Құрметті азаматы» төсбелгілісін иеленді.
Марапат биігінен көрінген аймақтың бас дәрігері Сәбит Пазылов өзінің алғысын білдіріп, ерекше қуанышын жеткізді.
– Әр азамат үшін өзінің кіндік қаны тамған туған жерінен ыстық, қадірлі, қымбат ештеңе жоқ. Болуы да мүмкін емес. Мен қойнауы қасиетті, Жаңақорғанның жазиралы жерінде өмірге келген азаматпын. Осы туған жер төсінде өсіп, ер жетіп, мектеп табалдырығында білім нәрімен сусындап, тәлім-тәрбие алдым. Нәтижесінде дәрігер мамандығын игеріп, білікті маман болдым. Медицина саласында ширек ғасыр еңбек етіп, денсаулық сақтау саласының дамуына қосқан еңбегімді туған өлкем ескеріп, төріне шақырды. «Жаңақорған ауданының Құрметті азаматы» атағына ұсынып, мерейімді асырды. Бұл марапат бұрынғылардан өзгерек. Туған жерімнің, жерлестерімнің құрметке бөлегені мен үшін бүгінге дейінгі жетістіктерімнен аса биік. Ел аман, бауырымыз бүтін болып, жұртымыз жақсылыққа жұмылсын! 95 жыл тарихы бар Жаңақорған жасай берсін!, – деп алғаусыз ақ тілегін білдірді.
Қойнауы кенге, ел іші өнерге бай, көңілі дарқан бір топ ауданның өнерпаздары Бексұлтан Байкенжеев ағамыздың әндерін орындап кештің көркін қыздыра түссе, елімізге танымал өнер жұлдыздары Бақтияр Тайлақбаев, Кеңес Әлімжан, Медет Салықов, Құрмаш Мақанов, Жолдасбек Әбдиханов әннен шашу шашып, аудан тұрғындарына керемет көңіл-күй сыйлады.
Ізгі тілектерден кейін өнерлі ұжым биден шашу шашып, әнмен даланы тербеді.
Мерекелік кеш әсем әнге, мың бояулы отшашуға жалғасты.
Әсел Рзаева