Музейге мән беру маңызды іс

Мұны Жаңақорған ауданының әкімі Руслан Рүстемов аудандық тарихи-өлкетану музейінің тыныс-тіршілігімен танысқанында айтты.
1904 жылы екі жылдық мектеп ретінде пайдалануға берілген қыш мектептің ғимаратында орналасқан музейдің мәселелері аз емес. Өлкенің тарихын танытатын мекемеге ең бірінші заманауи ғимарат керек.
Аудан әкіміне музейдегі залдарды директор Нәбіхан Шалапов пен музей қызметкері Бағдәулет Таждинов таныстырды. Мұражай қорында 10056 ден астам экспонат сақтаулы, оның 5426 негізгі қорға, 735 көмекші қорға жатады. 736 экспонат экспозицияға қойылған. Бірінші археология этнография залының экспозициясы Қаратаудан табылған таңбалы тастан басталады. Сыр бойындағы бейнелеу тарихы Қаратау сілемдеріндегі жартастар бетіне қашап ойып салынған адамдар мен жануарлар тұрпатты петроглифтен бастау алады. Ұлы Жібек жолының картасы берілген, Қазақстан үстінен өткен Ұлы Жібек керуен жолының бір тармағы бойында Жаңақорған өңірінің сол кездегі Сауран, Сығанақ, Аққорған, Өзгент қалалары жатты. Бұл керуен жолы сол қалалардың бірі ірі сауда нүктелеріне айналып, тұрмысының артуына, қала мәдениетінің өсуіне едәуір ықпал етті. Сондай- ақ Сығанақ қаласының ХХ ғасырда Махмұд Қашқари түсірген картасының көшірмесі, сауда қатынасында жүрген теңгелер, ертедегі Сығанақ, Сауран, Өзгент, Ордакент қалаларының орнынан табылған қыш құмыра, көзе, өрнектелген қыш сынықтары көрсетілген.Екінші залда аудан Қазан төңкерісіне дейінгі кезеңде, Кеңес үкіметінің орнауы көрсетілген. Сондай-ақ, ауданның мәдениет саласында ізі қалған Манап Көкенов, Құлан ақын және т.б жәдігерлерін көруге болады.
– Сыр өңірінің өзге аудандарында екі-үш музейден жұмыс істейді. Ауданның кешегісі мен бүгінің танытатын музейге жағдай жасау жағы кемшім тартып тұр, – деді Набихан Шалапов.
– Әрине, музейге қамқорлық танытуымыз тиіс. Бұл бағытта жүйелі жұмыс жүргіземіз, – деді Руслан Рүстемов.
Сосын әкім қолда бар мүмкіндікті пайдаланып әрбір залдағы экспонаттарды жаңартып отырудың маңызын ескертті.