Қола қоржында
Шымкент қаласында қол добынан өткен ХХХ-шы Қазақстан Республикасының чемпионатының І-лига ойындары аяқталды. Бұл сында Қызылорда облысының құрама командасы қола жүлдемен оралды. Облыс құрама командасының негізгі ойыншыларын Жаңақорған ауданының №8 ОРМБЖ спорт мектебі мен Жаңақорған спорт клубының оқушылары құрайды.
– Биылғы жылдың ең үлкен мақсат чемпион болып, жоғары лигаға өту болатын. Бұйырғаны осы болды, бұйырса келер жылы бұдан да биіктен көрінуге тырысамыз, – деді бас бапкер Құнанбай Салыбеков.
Иә, жаңақорғандық қыздар қол добынан аймақ құрамының негізін қалайтыны жасырын емес. Мектебі қалыптасқан бұл спорттың түлектері қазір ұлттық құрама сапында жүр. Есімі – Жанерке. Одан бөлек, жастар облыстың “Сейхун” құрамасында шыңдалуда. Аядай ғана Келінтөбе ауылынан шыққан қарлығаш қаракөздердің жеңістеріне жерлестері дән разы.
– Соңғы жылдары қыздардың жеткен жетістіктері көңіл қуантады. Бұл бапкердің біліктілігі мен қыздардың қырағылығы, маңдай тері. Жанеркенің ізінен еретін қыздар әлі талай шығады деп сенемін, – деді аудандық денешынықтыру және спорт бөлімінің басшысы Махмут Рахымжанов.
