Ардагерлер волейболмен дос
Жаңақорған кентінде Ұлы Отан соғысының ардагері Құдабай Наурызбаевты еске алуға арналған волейболдан ардагер спортшылар арасында аудандық ашық турнир өтті.
Денешынықтыру-сауықтыру спорт кешенінде өткен турнирге 6 команда қатысты. Дәстүрлі турнирдің нәтижесі бойынша Жұмахан Нұртазаев бастаған Жаңақорған командасы бірінші орынды алды. Ал күміс тұғыр Шиелі ауданына бұйырды. Үздік үштікті Қызылорда қаласының волейболшылары түйіндеді.
– «Ерлік мәңгі өлмейді» демекші, Құдабай Наурызбаевтың есімін ұрпақтары жыл сайын осылай ұлықтайды. Биылғы турнирдің ұйымдастырылу деңгейі жоғары. Дәстүрлі турнир жыл сайын жалғасын таба береді, – деді аудандық дене шынықтыру және спорт бөлімінің басшысы Махмут Рахымжанов.
Жеңімпаз командалар мен үздік ойыншылар аудандық дене шынықтыру және спорт бөлімінің грамоталарымен және демеушілердің тағайындаған бағалы сыйлықтарымен марапатталды.
