Сырым сөзге қалай жеңілді?

Сырым жолаушылап келе жатып бір үйге қонса, бір келіншек шай құйып отырады. Келіншектің өзі жас, күйеуі қарт адам екен. Сырым жолдасына қарап:
– Апырай, аққудың қасында жапалақ жараспайды екен-ау! – дейді.
Сонда келіншек сөзге түсіне қойып:
– Батыр, сіз бюір кезде тай жейтін Сырым едіңіз, енді қой жейтін Сырым болдыңыз әр нәрсе өз уағында емес пе? – депті.
Сырым бір жақтан шөлдеп келе жатып, бір үйден сусын ішіпті.
– Апырай, бір аяқ сусын бір кісінің құны екен ғой! – депті Сырым маңдайының терін сүртіп.
 – Жоқ, батыр, бір аяқ сусын бір емес, екі кісінің құны. Бұл сусын табылмаса шөлдеп сіз де өлер едіңіз, ұялып мен де өлер едім, – депті үй иесі.