БИЗНЕСТІҢ КӨЗІН ТАПҚАН БҰРЫМДЫ КӘСІПКЕР

Қазіргі таңда республика бойынша кәсіпкер қыз-келіншектердің үлесі 50 проценттен асқан. Мұндай жоғары көрсеткіштер әйелдер кәсіпкерлігінің дамуы әлеуетінің артқанын көрсетеді. Ал, шағын бизнес кәсіпорындарының 60 процентін әйелдер басқарып отыр екен. Әрине, мұның қатарында жаңақорғандық нәзікжанды кәсіпкерлердің де салмағы басым. Аудан бойынша 3 мыңның үстінде кәсіпкерлік субьектісі тіркелсе, оның 30 процентін бұрымдылардың бизнесі құрайды. Жергілікті әйел кәсіпкерлердің бейім кәсібі ол – сұлулық салоны, найбаухана ісі, тігінші, сауда-саттық, жекеменшік балабақша, тіс емханасы сынды салада белсенді жұмыс жасауда.

Міне, осындай қыз балаға лайықты, мәртебелі де, табысты кәсіпті таңдаған жаңақорғандық жас кәсіпкер Дананың жүзінен мейірім лебі мен жылулықты бірден аңғаруға болады. Сүйікті кәсібіне адалдықтан айнымаған бүгінгі кейіпкеріміз – «DS» сән салонының жетекшісі Дана Жанғабылова.
Бірден айта кету керек, кейіпкеріміз елімізге танымыл визажист Санди Бексырғаның шәкірті. Алматы, Астана, Қызылорда қалаларынан тәжірибе жинақтап өз кәсібімді ашсам деген ойға келген Дананың сұлулық саласындағы тәжірибесі 6 жылдан асқан, нақты жеке салонын кент орталығынан 2015 жылы ашады. Салон ішіне кіргеннен әр ұсақ-түйекке дейін өз орнында тұрғанын, ең бастысы жарық пен жайлылықты және кызмет көрсететін қыздардың ыстық ықыласын сезесің.
– Өзім шаштаразым болса деп қатты армандадым. Адам бір нәрсені қалап және сол жолда нақты жоспарларын жүзеге асырса алынбайтын асу жоқ екен. 2015 жылы кәсібімді бастап ашқанымда жүрексінгенім де, сәл қобалжығаным да рас.Өйткені айна алдында қайшы мен тарақтың қолданыс реті бөлек те, клиентіңнің көңілінен шығатындай дәрежеде шашын жинақы да, көрнекті қалыпта қиып берудің жөні тіпті бөлек. Оған этика мен мәдениетті тағы қосыңыз.Шүкір, әзірге естігенім тек жылы лебіз бен алғыс. Кәсібімізге сұраныс жоғары деңгейде деп айта аламын. Кент ішінде тұрақты клиенттерім жеткілікті, бірақ соңғы уақытта ауылдық жерлерден де «Instagram» желісі арқылы арнайы іздеп келіп қызметімізге жүгінетіндер де бар, – деді Дана Сапарбекқызы.
Дана басты мақсатына жету үшін көптеген оқыту курстарынан өтті. Мәселен, халыққа сапалы қызметін ұсыну мақсатында шаш сәнінен Алматы қаласында «Колорист» саласы бойынша оқып, Диплом алып келген. 4 адамды жұмыспен қамтып отырған маман түрлі семинарларға қатысып, тәжірибе жинақтап отырады. Шеберлікті арттыру курсынан қалмай оқуы оның ізденімпаз жан екенін аңғартады. Соның нәтижесі болар жақын арада тойханаларды сәндеу жұмысын қолға алмақшы екен.

Иә, елімізде әйел тек отбасының береке-бірлігін ойлайтын тұлға ғана емес, ол мемлекеттің маңызды мәселелеріне белсене араласатын қоғам мүшесі. Сондықтан біздің елде әйелдің саяси һәм қоғамдық белсенділігіне айрықша көңіл бөлініп, белсенді де іскер, білімді де білікті қыз-келіншектерге даңғыл жол ашылған. Бұл жөнінде Елбасы: «Қоғамның даму барысын өмірде – нәзік, көңілде – биік, ал істе – мығым әйелдер қауымынсыз көзге елестету мүмкін емес» деген болатын. Расында бүгінде нәзік жандылар кәсіпкерлік саласында ерлермен иық тіресе жұмыс жасап жүр. Соның айқын бір дәлелі – Дана Сапарбекқызының дара кәсіпкерлігі.

Лаура БИБАСАРОВА.