ТМД ЕЛДЕРІМЕН САУДА КӨЛЕМІ АРТЫП КЕЛЕДІ
Мемлекет басшысы Қасым-Жомарт Тоқаев Тәуелсіз Мемлекеттер Достастығы аясындағы экономикалық ынтымақтастықты тереңдетудің маңызын атап өтті.
Қазақстан үшін ТМД елдерінің нарығы маңызды сауда бағыттарының бірі болып саналады. Президент келтірген мәліметке сәйкес, өткен жылдың қорытындысында Қазақстанның Достастық елдерімен өзара сауда көлемі 40 миллиард долларға жуықтаған, ал биылғы жеті айда бұл көрсеткіш 10 пайызға өскен.
Сонымен қатар мемлекеттер арасында бірлескен өндіріс орындарын ашу бағытында да жұмыстар жүргізіліп келеді. Ресеймен өнеркәсіптік жобалар жүзеге асырылса, Өзбекстанмен ондаған жоба бойынша жұмыс жалғасуда. Беларусьпен арнайы және ауыл шаруашылығы техникасын бірлесіп өндіру жолға қойылған.
Бұл көрсеткіштер өңірлік сауда байланыстарының ауқымын және өндірістік ынтымақтастықтың мүмкіндіктерін көрсетеді. Алдағы уақытта бірлескен жобаларды дамыту жаңа өндірістер ашуға, экономикалық байланыстарды кеңейтуге және өзара тиімді серіктестікті нығайтуға ықпал ете алады.
