Әлем чемпионатының қола жүлдегерін жерлестері қарсы алды

Черногория мемлекетінде өткен жастар арасында бокстан әлем чемпионатының қола жүлдегері Аслан Елдібайұлын жерлестері зор қошеметпен қарсы алды.
Іс-шарада аудан әкімінің орынбасары Бектас Нуридинов әлем чемпионатының жүлдегерін аудан басшысы атынан құттықтап, астына атбозат мінгізіп, бапкерлеріне қаржылай сертификат табыстады.
-«Бұл жеңіс – алтынға бергісіз ауданымыз үшін спорт саласындағы зор жетістік болды. Елдігіміздің еңсесін көтеріп, көк туымызды әлемдік аренада желбіретер – өзіңдей жастар мемлекетіміздің, тұтастай халықтың мақтанышы деп білемін.»- деді аудан әкімінің орынбасары.
Сондай-ақ, ауданның құрметті азаматтары Серік Мұсабай мен Мадияр Ахметов Асланды әлі талай спорт бәсекесінде ел абыройын биікке көтеретініне сенім білдірді.
Іс-шарада Аслан Елдібайұлы бұл жеңіспен тоқтап қалмайтынын, жанкүйерлер сенімін ақтауға бар күшін салатынын айтты.