Қазақстанда мемлекеттік қызметтерді 1414 нөмірі арқылы көрсету процесіне Кеңес роботы қосылды.

1414 бірыңғай байланыс орталығына хабарласу кезінде Кеңес роботы қоңырау шалушымен амандасып, телефон арқылы мемлекеттік көрсетілетін қызметтер бойынша консультация береді, деп хабарлады «Ұлттық ақпараттық технологиялар» АҚ баспасөз қызметі.
Кеңес роботы қазақ және орыс тілдеріндегі сөздерді, сонымен қатар қазақша-орысша аралас сөйлемдерді анықтай алатын болып әзірленген. Жоба тестілік режимде іске қосылғандықтан, бүгінгі таңда робот пайдаланушылардың ең танымал 10 сұрау салулары бойынша консультация береді.
Атап айтқанда, жеке тұлғалардың жылжымайтын мүлік салығын төлеу, сотталғандығы болуы не болмауы туралы анықтама беру, зейнетақы аударымдары туралы анықтама алу, жылжымайтын мүлікке тіркелген құқықтар (ауыртпалықтарды) және оның техникалық сипаттамалары туралы анықтама беру, МӘМС (медициналық сақтандыру), лицензиялар мен рұқсат беру құжаттарын іздеу, ЭЦҚ алу, балабақша кезегін тексеру/қою,ХҚКО жұмыс уақыты, ЖҚЕ айыппұлдарының болуы не болмауы.
Айта кетейік, Кеңес роботы egov.kz порталының және www.1414.kz сайтының пайдаланушыларына интерактивті online-кеңес көрсетуге арналған виртуалды көмекші ретінде ұсынылған. Кеңес виртуалды роботы – анимацияланған кейіпкер. «Өзің туралы айтшы» деген сұраққа Кеңес «мен ақылды және мейірбанмын» деп жауап береді, азаматтарға «Отбасы», «Білім», «Жылжымайтын мүлік», «Бизнесті тіркеу және дамыту» тақырыптары бойынша кеңес көрсете алады, «Портал туралы», «Парольді жаңарту», «Мекенжай анықтамасы» бойынша көмек көрсете алады.