» » Тоқаевтың тапсырмасы: министр мұғалімдердің жалақысын көтеру қашан басталатынын айтты

Тоқаевтың тапсырмасы: министр мұғалімдердің жалақысын көтеру қашан басталатынын айтты


Асхат Аймағамбетовтың айтуынша, әуелі мұғалімдер мәртебесі туралы заң қабылдануы тиіс.
Білім және ғылым министрі Асхат Аймағамбетов төрт жылда мұғалімдердің жалақысын екі есеге көтеру үшін не істеу керектігін айтты, деп хабарлайды
Sputnik Қазақстан тілшісі.

"Мұғалімдердің жалақысын көтеру үшін алдымен заңды ("Педагог мәртебесі туралы" заң - Sputnik) қабылдау қажет. Осы заң биыл қабылданады деген сенім бар. Бүгін үкімет басшысының орынбасары да осыны айтты. Сондықтан бәрі заңның қабылдауына байланысты болады. Дегенмен, негізгі өзгерістер келесі жылдан басталады деген жоспарымыз бар", - деді Аймағамбетов арнайы баспасөз мәслихатында.
Министрдің айтуынша, төрт жылдың ішінде көтерілген жалақыға инфляция әсер етпейді. Осы орайда журналистер мұғалімдердің қазіргі орташа жалақысы қанша екенін сұрады. Аймағамбетов оны айта алмайтынын жеткізді. Себебі бүгінде мұғалімдер жеті бірдей үстемақы алады. Соның ішінде сынып жетекшілігі, дәптер тексеру, біліктілік деңгейі және тағы басқа көрсеткіштер бар. Алайда бес жылдық еңбек өтілі бар жас мұғалімнің қаладағы жалақысы 70 000 теңгені құрайды.

Тоқаевтың тапсырмасы

Бүгін Тамыз кеңесінің пленарлық мәжілісіне қатысқан президент Қасым-Жомарт Тоқаев үкіметке төрт жыл ішінде мұғалімдердің жалақысын екі есеге өсіруді тапсырды.
Президенттің айтуынша, бүгінде мұғалімдердің жалақысы ең төмен деңгейде қалып отыр және экономика бойынша орташа жалақының 65 процентін ғана құрайды.

Педагог мәртебесі туралы заң

Бүгінгі жиында мемлекет басшысы "Педагог мәртебесі" туралы заң жобасының негізгі жаңалықтарына да тоқталды. Оның айтуынша, осы құжатта ұстаздарды қолдаудың кешенді шаралары қарастырылған.
Атап айтқанда, мұғалімдердің жүктемесін азайту, абыройы мен беделін көтеру, материалдық жағдайын жақсарту жоспарланып отыр. Сондай-ақ сынып жетекшілігі мен дәптер тексергені үшін қосымша ақыны екі есеге өсіру, еңбек демалысының мерзімін 56 күнге дейін ұлғайту, магистр дәрежесі үшін үстемақы төлеу және тағы басқа шаралар бар.


17 тамыз 2019 ж. 462 0