ТӨМЕНАРЫҚТА ТҰРҒЫНДАРДЫ ҚАБЫЛДАУ ӨТТІ

«AMANAT» партиясы Жаңақорған аудандық филиалының бекітілген жұмыс кестесіне сәйкес облыстық мәслихат депутаты Жанкелді Ойшыұлымен бірге Төменарық округінде ауыл тұрғындарымен кездесіп, қоғамдық қабылдау өткіздік. Қабылдауда ауылдық округ ардагерлері кеңесінің төрағасы мен мүшелері, округ әкімі болды.

Әуелі қабылдауға кірген ауыл ақсақалдары Темірбек Құтжанов пен Орынбасар ағамыз сайлауалды үгіт насихат жұмысын жүргізу барысында көтерілген мәселелердің 90 пайызы шешімін тапқанын айтып алғысын білдірді. Соның ішінде ауылдың табиғи газбен қамтылуы, диодты жарықтың жүргізілуі мен ауыз судың да мәселесі шешілгенін жеткізген ақсақалдар жақында жаңадан бой көтерген аурухананың да ел игілігіне берілер күн алыс емес екенін айтып қуаныштарын жасыра алмады.

Тұрғын саны күннен күнге артып келе жатқан ауылдың басқа да мәселелері жетерлік. Алайда бәрі дерлік ретімен шешілетінін де түсінген тұрғындар басты талаптарының орындалғанына тәубе дейді.
Одан әрі қоғамдық негізде жұмыс істейтін жұмысшылар қабылдауда болып, көкейінде жүрген мәселелерін айтты. Тұрғындар тарапынан айтылған өтініштер мен ұсыныстардың жүзеге асырылуын өз бақылауымызға алып, мәселелердің оң шешілуіне жол нұсқап, кей жәйттерге депутаттық сауал жолданатынын жеткіздік.