– Құрметті ата-аналар, балалар, өздеріңізбен қауышып отырғанымызға қуаныштымыз. «Күш – білекте, мейірім – жүректе» дейді дана халқымыз. Атааналарымыз бізді әрдайым кеңпейілді болуға, қолымызда барымен өзгелермен бөлісіп, жәрдемдесуге баулыды, тәрбиеледі. Жаңа оқу жылының басталуына санаулы күндер қалды. Бала – біздің болашағымыз. Әр баланың таным қабілеттерін арттыру, шығармашылық потенциалына және жан-жақты дамуына мүмкіндік бере отырып, ең жақсы жағдайларды қамтамасыз етуіміз қажет. Бүгінде балаларымыздың болашағына бейтарап қарамай, мүмкіндігінше «Мектепке жол» акциясы аясында қолдау көрсетіп, көмек беруді жөн санадық. Ең бастысы, еліміздің ертеңіне балап, болашағынан үміт күтіп отырған балапандарымыз еш қиындық көрмей, саналы әрі сапалы білім алса деген ниеттеміз, – деді мектеп құрылтайшысы Сәуле Жорабекова.

Қайырымдылық – адам бойындағы асыл қасиеттерінің бірі де бірегейі. Мұқтаж жандарға жақсылық жасау – бұл адам баласының ең ізгі амалы. Қазақта «Кең болсаң – кем болмайсың» деген нақыл бар. Мұның астарына үңілсеңіз, адам бойындағы жомарттық, қайырымдылық қасиеттерді меңзейді. Яғни, «Атымтай Жомарт» атанып, мұқтаж жандарға көмектесіп, кең болғанда төрт құбылаң тең болады деген сөзге саяды емес пе? Бүгінгі «Мектепке жол акциясынан» осындай ой түйіп, «Қыран» негізгі орта мектебінің құрылтайшысы Сәуле Жорабекованың бойынан жомарттықты, өзінен бұрын өзгеге жанашырлықты көріп қайттым.