“Дерт көп, ал денсаулық біреу” демекші, салауатты өмір салтын ұстану айтарлықтай маңызды мәселе. Қазіргі кезде білім беру мекемелерінің алдында тұрған міндеттердің бірі – жас ұрпақтың салауатты өмір сүруге көзқарасын қалыптастыру, физикалық денсаулығын сақтау бағытында, қоршаған орта – табиғат ананы аялап, қадірлеуге һәм жоғары, сапалы білім алып, білімін іс жүзінде пайдалана білуге тәрбиелеу керек.

Оқушы денсаулығының сапасы неге байланысты? Мектеп жасындағы балаларға қандай қызметтер тегін көрсетіледі?
Мектеп жасындағы балаларға рентген, қан талдауының барлық түрі, стоматология, тері жағдайы, хирург, лор, окулист, невропотолог, терапевт, психиатр, психолог, нарколог сынды қызметтер тегін көрсетіледі.
Жаңақорған аудандық емхана химизаторы Өсерова Бибайым Шайхисламқызынан оқушылар арасында қай ауру жиі кездесетінін сұрадық.– Мектеп оқушылары арасындағы аурулардың ішінде бірінші орында – асқазан-ішек жолы дерттері тұр, яғни бұл жағдай тексерумен қамтылғандардың 25 пайыздан астамына қатысты. Екінші орында көз аурулары (16 пайыз), ал үшінші орында тыныс алу жолдары тұр дейді.– Жасөспірім денсаулығына кімдер жауапты?
– Алдымен ата-ана. Ата-аналар жиналысында балалардың салауатты өмір салтын сақтау мақсатында баяндамалар оқылып, денсаулықты нығайтуға және сақтауға байланысты ережелер мен кеңестер берілу керек. Білім сапасын арттырудың маңызды жағдайын жетілдіре отыра, сабақ үстінде оқушылардың денсаулығын сақтау барысында сергіту сәті мен психологиялық тренингтерді күнделікті сабақта өткізу пайдалы, себебі оқушылар сабақ үстінде көп шаршамайды және сергіту сәттерінен кейін серпіліп оқуға кіріседі.Тренингтер, сергіту сәттері оқушының өзін еркін ұстап, өзгеге сенімін, жылуын күшейту арқылы тыныс алу жолдарының, нерв жүйесіндегі шаршағанды ұмыттыруға көмектеседі.Қорыта айтқанда, бүгінгі таңда еліміздегі мектептердің әлеуметтік міндеті жас ұрпаққа сапалы білім, баланың саулығын сақтап, саналы тәрбие беру. Олардың әрқайсысы өмірден өз жолын табуға көмектесуді негізгі мақсат еткені абзал. Халқымыздың тәлім-тәрбиелік мұрасын, салт-дәстүрін пайдалана отырып, «баланы жастан» демекші, дені сау, сана-сезімі терең, ақыл ойы зерек ұрпақ тәрбиелеу, баланы бесігінен жақсы әдетке баулу – әр ата-ананың басты парызы. Оқушының денсаулығына зиян келтірмей, оны сақтауды, нығайтуды білім беру арқылы үйретіп, оқушының өз денсаулығына жауапкершілігін арттыру мұғалімнің міндеті.