Сенат депутаттары Ақылбек Күрішбаев, Ләззат Сүлеймен және Еділ Мамытбеков Лев Гумилев атындағы Еуразия ұлттық университетінің студенттерімен кездесті.

Отырыс барысында сенаторлар Конституцияға енгізілген өзгерістер елімізде жүргізіліп жатқан саяси реформалар аясында жүзеге асырылып жат­қанын атап өтті. Ақылбек Күріш­баев жиналғандардың назарын Конституцияға енгізілген өзгеріс­тер аясында жер мәселесі түбегейлі өзгертілетініне аударды. Жер халықтың меншігіне айналады.

«Бұл өзгерістер Жаңа Қазақ­станды құрудың негізі болады. Сондықтан жастардың мұны түсініп, референдум науқанына қатысуы өте маңызды. Бізде ақылды, өнерлі оқушылар көп екенін білемін. Сондықтан мен еліміздің болашағына толық сенімдімін», деді депутат.

Сенатор Ләззат Сүлеймен бұл шешімдер мен өзгертулер ар­қы­лы Мемлекет басшысы «супер­президенттік» басқару жүйесінен күшті Парламенті бар президенттік басқару жүйесіне көшу туралы шешім қабылдағанын айтты. Өз кезе­гінде депутат Еділ Мамыт­беков Конституцияға өзгерістер мен толық­тырулардың жалпыхалықтық рефе­рендумда енгізілуі тарихи оқиға екенін баса айтып, бұл үдеріс­ке барша қазақстандықтардың қаты­суының маңыздылығын атап өтті.

Сонымен қатар, кездесу барысында студенттер сенатор­ларға мемлекеттік тілді дамы­ту, жерді пайдалану секіл­ді өздерін қызықтырған сұрақ­тарды қойды.