АУДАНЫМЫЗДА ЧЕРНОБЫЛЬ АПАТЫНА ҚАТЫСҚАН АЗАМАТТАРДЫ ЕСКЕ АЛУ ШАРАСЫ ӨТТІ.
Бүгін ауданымызда Чернобыль апатының орын алғанына 36 жыл толуына орай апат салдарын жоюға қатысқан азаматтарды еске алу шарасы өтті.
Алдымен Жаңақорған кенті әкімі Sardarmuhameduali Sadikov Чернобыль апатын жоюға қатысқан бірқатар жаңақорғандық азаматтарды қабылдап, аудан әкімі Мұрат Жолкелдіұлы Тілеуімбетовтің "Алғыс хаты" мен сый-сияпатын табыс етті.
Содан кейін, Жаңақорған кентіндегі "Тағзым" алаңында Чернобыль апатының орын алғанына 36 жыл толуына орай сол апатты залалсыздандыру кезінде қаза болған сарбаздарды бір минут үнсіздікпен еске алып, рухтарына Құран бағышталды.

Өздерін құрбан ете отырып, Чернобыль апатының зардабын жоюға 800 мың адам, соның ішінде 32 мың қазақстандық қатысты.
Қазіргі кезде Қазақстан Республикасында апатты жоюға қатысқан 4519 адам, оның ішінде 24 жаңақорғандық азамат ортамызда. Апатты жоюға қатысқан әрбір ардагерге мемлекет тарапынан жыл сайын тиісті әлеуметтік төлемдер жасалып келеді.

Ерлік еңсесі мәңгілік ел жадында.