Сыбайлас жемқорлықтың алдын алу жұмыстары талқыланды
Облыстағы дәріхана өкілдері Қызылорда облысының тауарлар мен көрсетілетін қыметтердің сапасы мен қауіпсіздігін бақылау департаменті мен Қызылорда облысы бойынша сыбайлас жемқорлыққа қарсы іс-қимыл департаменті басшылығымен кездесті.
Жиында сыбайлас жемқорлыққа қарсы мәдениетті қалыптастыру және фармацевтикалық қызмет саласындағы сыбайлас жемқорлықтың кез келген көріністеріне төзбеушілік ахуалын құру мәселелері талқыланды. Мұндағы басты мақсат – әлеуметтік маңызы бар салалардың бірі – денсаулық сақтау жүйесі, оның ішінде фармацевтикалық қызметтегі сыбайлас жемқорлық тәуекелдерін жою, фармацевтика саласындағы кәсіпкерлерді мемлекеттік қадағалаушы органдардың заңсыз тексерістері мен әкімшілік кедергілерден қорғау, сыбайлас жемқорлыққа қарсы мәдениетті қалыптастыру.
Бас қосуда Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Қызылорда облысы бойынша департаменті басшысының бірінші орынбасары Б.Ниязов денсаулық сақтау мен фармацевтикалық қызмет жүйесінде сыбайлас жемқорлықтың алдын алу бағытында атқарылып жатқан жұмыстар барысын баяндады. «Ақмешіт – адалдықалаңы» жобасының мақсат-міндеттерімен таныстырды.
Департамент басшысы Г.Байменова сыбайлас жемқорлықтың кез келген көріністеріне төзбеушілік жағдайын қалыптастыру бойынша департаментте жүргізіліп жатқан іс-шаралар туралы баяндады. Фармацевтикалық қызмет бағытында бизнес-қауымдастық мүшелеріне мемлекеттік қызмет көрсету кезінде азаматтар үшін қолайлы жағдай жасалғанын атап өтті. Сонымен қатар жұмыстағы жариялылық пен ашықтықты қамтамасыз ету мақсатында департаменттің ресми сайтында жоспарлы тексерістердің кестесі, мемлекеттік сатып алу бойынша жылдық жоспар, нормативтік-құқықтық актілер заңға сәйкес орналастырылып, халықпен кері байланыс орнату мақсатында әлеуметтік желілерде департамент және оның басшылығының жеке парақшалары бар екенін жеткізді.
Бас қосуға арнайы шақырылған өңірдегі дәріхана өкілдері фармацевтикалық қызмет саласындағы өзекті мәселелерді ортаға салып, дәрілердің рецептуралық босатылуы, дәрілік заттардың шекті бағалары бойынша өз ұсыныстарын ортаға салды.
Жиын соңында фармацевтикалық қызмет саласындағы сыбайлас жемқорлық тәуекелдерінің алдын алу, кәсіпкерлікті заңсыз әкімшілік кедергілерден қорғау мақсатында өзара ынтымақтастық меморандумға қол қою бойынша келіссөздер жүрізілді.
