МЕРЕКЕ ҚАРСАҢЫНДА 4 СӘБИ ДҮНИЕГЕ КЕЛДІ

Тұңғыш Президент күні қарсаңында Жаңақорғанда 4 сәби дүние есігін ашты. Оның екеуі ұл, екеуі қыз. Төрт шаңырақты шаттыққа бөлеген бақытты аналарды құттықтау үшін аудан әкімі Ғалым Әміреев арнайылап перзентханаға барды. 
Алдымен, ауданның бас дәрігерінен ана мен бала денсаулығын сұраған аудан басшысы: 
– Президент күні қарсаңында өмірге келіп жатқан балапандарыңыз өскенде үлкен азамат болып, елдің тірегі болсын. Халықтың сүйікті ұлы болсын, Елбасы жалғаған ізгі жолда жүрсін. Қыздарыңыз қылықты, ұлдарыңыз ұлықты болсын, – деп аналарға жылы лебізін арнады. Әрі, сый жасады.  
«Бала – көңілдің гүлі, көздің нұры» деген ұлағатты берік ұстаған қазақ халқы баланы байлығы деп бағалаған. Иманды ұл, ибалы қыз тәрбиелеуді міндетіне жатқызып, қазына толы байлығымен емес, өмірін жалғар ұрпағының көптігімен мақтанған. Өмірге ұл келсе «атқа мінер туылды» деп сүйіншілеп, «ұл туғанға күн туған» деп беделін асқақтата түскені рас. Әрине, болашақта ана болып, өріс кеңейтер қызды да қадірлеген, алақанына салып, аялаған. «Қыз туылса – өрісім кеңейді» – деп қуанатын да болған.Сондықтан, бүгін дүние есігін ашқан сәбилердің дені сау болуына біз де тілекшіміз.