Адам саулығы салғырттықты көтермейді

Сәрсенбі күні “Жаңақорған тынысы” редакциясы ғимаратында аудандық тауарлармен көрсетілетін қызмет түрлерінің сапасы мен қауіпсіздігін бақылау басқармасы қызметі мамандары журналистерге брифинг берді.

Брифингте белгілі болғанындай, аудан бойын­­ша сарып ауруынан 2019 жылы эпиде­миологиялық ахуал күрделеніп, күрт өсу қарқыны байқалып отыр. Атап айтқанда, жылдың жеті айында аса қауіпті жұқпалы сарып ауруының 17 жағдайы есепке алынған. Оның ішінде жасөспірімдер арасында 4 жағдай тіркелді. Былтырғы 2018 жылдың осы мерзімінде сарып ауруымен 4 науқас тіркеліп, аурушаңдық көрсеткіші 4,7-ні құраған болатын. Аурушаңдық көрсеткіші былтырғы жылмен салыстырғанда 4,3 есеге жоғарылап, сарып ауруының эпидемилогиялық ақуалы алаңдатып отыр.
– Адамдар бұл ауруды қалай жұқтыруы мүмкін?
– Бұл індетті адамдар ауру малды күткенде, жан-жануарды төлдету кезінде, ауру малдың етін жіліктегенде, індеттелген малдың еті мен сүтін пайдаланғанда, сирек те болса ауа арқылы және өңдеу кездерінде жұқтырады.
Балалардағы бруцелездің негізгі жұғу жолы: алиментарлы (қайнатылмаған сүт арқылы) ауру біртіндеп басталады және көбінесе қызба болмайды. Баланың терісі бозғылттанып, лимфа түйіндері үлкейеді, тірек-қимыл жағынан әлсіз өзгерістер басталады.
– Одан сақтану жолдары қандай?
– Ауру малдарды бағып күткен кезде аса сақ болу қажет. Аурудың алдын алу үшін мына ережелерді орындау керек: малды төлдетуге, шомылдыруға, қырқуға қатысатын адамдар алдын ала 1,5-2 ай бұрын дәрігерлік тексеруден өтуі тиіс. Әр уақытта малдарды бруцеллез ауруына тексерту. Мал ауырса, түсік тастаса, мал дәрігеріне хабарлап, себебін анықтау. Ауырған малдың төлін анасынан оқшаулау, індеттелген малдарға бөлек жай , суат дайындау қажет . Ең бастысы, халық өз денсаулығына салғырттық танытпау керек. Сұрақтарға мекеменің бас маманы Нысанкүл Қауленова жауап берді.

Баян ҮСЕЙІНОВА