Абай облысының әкімі Нұрлан Ұранхаев "Қазақстан барысы" турнирінің жеңімпазы Ерасыл Қажыбаев пен жарыстың қола жүлдегері Саят Шәмшиевті марапаттады. 
Өңір басшысы спортты дамытуға және ұлттық күресті насихаттауға қосқан үлесі үшін қос спортшыға демеушілер атынан темір тұлпар табыстады. Сондай-ақ Ерасыл Қажыбаевқа үш бөлмелі пәтердің сертификаты берілді.
"Мен бұл турнирге алтыншы рет қатысып отырмын. Көп дайындалдық, жеңісті Абай облысына алып келу үлкен мәртебе. Жеңісімді туған жеріме, жерлестеріме арнаймын. Алдағы жылғы жарысқа да тыңғылықты дайындаламын", - деді Ерасыл Қажыбаев.
Ерасыл Қажыбаев дзюдодан кадеттер мен жастар арасындағы Қазақстан чемпионаттарында жүлдегер атанған, Джакартадағы 2018 жылғы Азия ойындарындағы командалық жарыстардың күміс жүлдегері, сондай-ақ 2017 жылы самбодан Азия чемпионы және 2016 жылы әлем чемпионатының қола жүлдегері.
Ал "Болатшы" лақап атымен өнер көрсеткен Саят Шәмшиев – Қазақстанның халықаралық дәрежедегі спорт шебері, дзюдодан ел чемпионы және самбодан әлем чемпионатының қола жүлдегері.