"Мессидің футболкасын" киген балақайдың отбасы басқа жаққа көшуге мәжбүр

Пластик пакеттен Мессидің футболкасын киген суреті арқылы әлемге танымал болған Мұртаза Ахмадидің өмірі қауіпке айналды деп жазады zhanaqorgan-tynysy.kz сайты baq.kz сілтеме жасап.
Азаттықтың жазуына қарағанда, "Мессидің футболкасын" киген ауғанстандық баланың отбасы тұрып жатқан жерінен көшуге мәжбүр болып отыр.
Жеті жастағы Муртаза Ахмадидің "Мессидің футболкасымен" түскен суреті осыдан екі жыл бұрын әлеуметтік желілерде тарап, өткен жылы желтоқсанда оның арманы орындалып, Лионел Мессидің өзімен кездескен болатын.
"Алайда, осылай танымал болғанымыз өзімізге кесірін тигізді" - дейді баланың анасы Шафика Ахмади.
Оның айтуына қарағанда, Муртаза екі жылдан бері мектепке бара алмай қалған. Себебі қылмыскерлер баланың отбасы байып кетті деп ойлап, баланы ұрлап кетуге дайын. Тіпті "Талибан" террорлық тобының жанкештілері де бұл отбасының "байлығына" қызығатын көрінеді.