Несиеңіз жабылмаса, әлеуметтік желі арқылы хабарласыңыз!

Еңбек және халықты әлеуметтік қорғау министрлігі әлеуметтік желілерде борыш жүктемесін азайту мәселелері бойынша аккаунттар ашты, деп хабарлады министрліктің баспасөз қызметі.

Министрлік енді Facebook және Instagram әлеуметтік желілеріндегі «Бәрі борыш жүктемесін азайту туралы» деген парақшалар арқылы сұрақтарға жауап береді. Бұл аккаунттар халықтан борыш жүктемесін азайту мәселелері бойынша өтініштерінің көп болуына байланысты ашылып отыр.

Бұған дейін хабарланғандай, борыш жүктемесінің төмендеуіне үміткер азаматтар өз мәртебесін келесідей тексере алатыны белгілі:

– Еңбек және халықты әлеуметтік қорғау министрлігінің ресми сайтындағы сілтемеге ЖСН енгізіп, сұрау жіберу арқылы;

– Электрондық үкімет порталының басты бетінде орналасқан «Борыш жүктемесін азайту бағдарламасына қатысу үшін мәртебені тексеру» электрондық сервисінің көмегімен. Ол үшін ЭЦҚ қажет болады;

– Еңбек және халықты әлеуметтік қорғау министрлігінің базасында жұмыс істейтін call-орталықта 111, 74-32-20, 75-01-79, 75-01-78 телефондары бойынша консультация алу;

– Халыққа қызмет көрсету орталығына жүгіну арқылы.

Бүгіннен бастап қазақстандықтар мемлекет есебінен қарыздар мен микрокредиттер бойынша берешекті өтеу мүмкіндігі туралы кеңесті облыстардың, Нұр-Сұлтан, Алматы және Шымкент қалаларының жұмыспен қамтуды үйлестіру және әлеуметтік бағдарламалар басқармаларынан, «Мемлекеттік әлеуметтік сақтандыру қоры» АҚ және оның филиалдарынан, сондай-ақ облыстардағы, Нұр-Сұлтан, Алматы және Шымкент қалаларындағы Еңбек, әлеуметтік қорғау және көші-қон комитетінің аумақтық департаменттерінен ала алады.

                                                                                                                                                    egemen.kz